小 Bee Bee 日誌

打道回府~!

Thursday, May 31, 2007, 11:44 AM - 生活點滴, 相片特區

今日醫生話小Bee Bee 終於可以出院喇，咁姐係話我都可以出院喇 [icon040]

老公請左假同奶奶黎接我地。

今次只係老公第一次抱小Bee Bee，父女團聚喇!

奶奶都好開心咁抱孫，小Bee Bee好識做咁望住鏡頭，嫲嫲就自然四萬咁口

睇清楚先:「何婉慧之女」，冇攞錯人地個B喇

出院之前再望一望我用左好多個鐘頭響裡面餵奶嘅育嬰室...門口

返到屋企第一樣要做嘅梗係下試下張新床先

小Bee Bee﹕「張床...」

小Bee Bee﹕「OK 喎!」

小Bee Bee﹕「不過... 我好肚餓~~~ 我喊!!!」

唔洗驚，爸爸黎救你!

小Bee Bee﹕「食完奶，有d眼訓添，呵欠~~ 同媽咪一齊訓翻個靚覺先!」

如事者...

訓訓訓...

訓訓訓...

食食食...

訓訓訓...

訓訓訓...

食食食...

訓訓訓...

痾痾痾...

最後同姑姐同爺爺影翻張靚相

1 回應 ( 109預覽 ) | 永久連結 | 相關連結

幪面超 Bee

Wednesday, May 30, 2007, 09:11 AM - 生活點滴

今日醫生同小Bee Bee 抽血驗黃胆，結果有9.4度，超左表少少，所以要照一日燈。小Bee Bee 戴咗眼罩，仲有d膠紙貼住眼仔...

雖然我知道BB照燈係好平常 (因醫生話三分之一嘅初生 BB 都會因為黃而需要照燈)，但當我見到小Bee Bee 帶住眼罩個樣我真係好心痛，仲差d喊咗出嚟...

[icon020]

姑娘話今日最好盡快餵奶，等 BB 可以多d時間照燈，快d好返。因此我今日決定向醫院借用奶泵，揼定d奶奶比小Bee Bee，等佢可以食快d又無咁攰... 哈哈，原來個電奶泵好嘈，我同房話佢係廁所都知道我響度揼緊奶，仲令到佢非常好奇咁走嚟睇住我揼，哈哈，真係有d尷尬 [icon012]

我覺得小Bee Bee 真係好乖，雖然佢比人幪住對眼，但係佢都唔會好似其他 BB 咁扭計喊。小Bee Bee 真係好堅強，好抵錫。我發覺自己對小Bee Bee 嘅愛已經到咗不能自拔嘅地步喇!! [icon019]

我房門口嘅名牌

諗翻起，自小Bee Bee 出世至今日不經不覺已經4日，而喺呢4日裡面小Bee Bee 迅速成長，好似每一日都學識一d新野咁。

啱啱出世 ~ 粉團一舊，雙眼不停的眨下眨下，識玩口水泡。

出世後十個鐘 ~ 依然係粉團一舊，咪埋雙眼訓呀訓。當抱起佢嘅時候感覺小Bee Bee 好似只係一舊棉花，全身無力，好軟... 但當餵佢食奶時，小Bee Bee 唔洗張開眼但又識得嘟起嘴仔揾食...

出世後第二日 ~ 當食奶奶時識得同我有眼神接觸 (雖然食奶奶時大多數時間都係好攰咁咪埋眼睛)。仲識得單眼撐開小小眼皮嚟裝下裝下，開始唔似一舊粉團，識得自己將面仔寧向左寧向右。

出世後第三日 ~ 當掃風仍團團轉時，識得用手仔捉住我。

出世後第四日 ~ 唔肯食奶奶，識得用條脷仔頂住，仲識含住啖奶奶嚟應酬我，到掃風時就吐返出嚟!!

[icon010]

4 回應 ( 168預覽 ) | 永久連結 | 相關連結

餵奶回憶錄

Tuesday, May 29, 2007, 11:23 AM - 生活點滴, 相片特區

上午8點 ~ 餵奶時發覺小Bee Bee 真係好似老公，尤其是雙眼同表情。小Bee Bee 食奶時大多數時間都係合埋眼，但仍然會經常做出各式各樣嘅「得戚」表情，例如:

「咪」起個嘴仔 + 戚一戚眼眉 = 老公整蠱完人地後懶得戚果個樣

我睇到忍唔住笑左出黎! 小Bee Bee 又會喺你叫佢醒醒時，單眼撐起小小眼皮用眼尾裝一裝你，然後一面闊佬懶理咁繼續「咪」埋眼訓覺，望住佢真係覺得好好笑, 好可愛!

似唔似老公呢？

上午11點45分 ~ 餵完奶，掃風時小Bee Bee 識用佢隻手仔捉住我隻手喇，好Cute!!

晚上9點 ~ 餵奶時小Bee Bee 第一次同我有真正嘅眼神接觸，好開心。

響床度玩水上樂園激流!

2 回應 ( 150預覽 ) | 永久連結 | 相關連結

我在法國的日子

Monday, May 28, 2007, 10:17 AM - 生活點滴

所謂「法國」，就是指法國醫院囉~~
[icon003]

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

生完小Bee Bee 之後果晚只係訓左兩個鐘頭，之後可能因為興奮過頭，一路都訓唔著。

因為唔夠訓尋日勁攰，加上全日都要餵哺 (每三個鐘頭就要餵一次)，同埋有好多有心嘅親友探訪，所以全日都冇咩休息過。到晚上10點餵完最後一次奶之後就頂唔順大昏迷左。 [icon031]

一直到今朝，朦朦朧朧之際好似聽到亞余醫生把聲，原來佢六點幾就已經黎巡房。呢次係生完之後佢第一次黎巡，訓訓下佢突然間走埋黎，搞到我以為撞鬼!! [icon033]

佢走左之後我又要開始我嘅餵奶生涯~ 又係三個鐘頭一次。其實係因為小Bee Bee 輕磅d，個胃比較細，所以要少食多餐，其他嘅媽咪四個鐘先要餵一次。尋日累積左經驗，今日安排時間自然有進步，我每一次餵完奶就會立即爭取時間休息，所以今日比尋日精神好多。 [icon044]

小Bee Bee 今日又變左樣

我精神左姐，但係小Bee Bee 呢兩日都係好眼訓。可能因為佢今日打埋「卡間苗」，每次食奶都會訓著。當佢冇訓著果時佢又會一路食一路發出「砵碌砵碌」咁聲 (你地估下係咩聲。提示:唔係放屁...)。連姑娘都話:「係呀，哈哈，直腸直肚架佢~ 一路食一路...」。我隻手托住佢個pat pat都覺得有d熱，又好重，好似好多咁 [icon025]