今日第一次去王醫生度做檢查, 心情好緊張, 因為即將會見到小Bee Bee第一面

去到診所, 醫生同我做Ultra-sound, 喺個screen度我見到有一團野, 中間有一點不斷咁閃吓閃吓, 醫生開咗個speaker比我聽小Bee Bee嘅心跳。 醫生話我知, 我見到嗰團物體就係我同老公嘅baby, 而閃吓閃吓嘅就係baby's心臟。 呢一刻我嘅心情非常之難以形容, 好興奮好興奮但又有少少接受唔到呢個事實。 我真係成為媽媽?! 我還未有足夠嘅心理準備呢, 究竟我能唔能夠勝任? 我以後嘅生活會變成點呢? 太多太多嘅問號浮現喺我腦裡面

當我正努力調整自己情緒嘅時候, 王醫生叫我留意screen裡面除了小Bee Bee外仲有另一個sac ~ 即是胚胎所住嘅地方。 但奈何醫生喺呢個sac裡面揾唔到任何胚胎, 所以醫生推斷有一個胚胎因某種原因而未能正常發育... 聽到呢度我個心突然覺得隱隱作痛, 好想喊。 但諗起小Bee Bee依然好堅強, 好努力咁生存落嚟, 我就同自己講唔可以喊, 亦都唔需要再顧慮咁多, 小Bee Bee好可能係排除萬難先可以同我見面呢, 我要為擁有一個咁有生命力嘅baby而開心, 自豪!!

呢排每晚都要起身去幾次小便, 攪到我嘅睡眠質素極差, 情況就正如早前"都市閒情"講嘅夜尿症一樣。 正當我懷疑自己係尿症嘅時候, 老公問我其實係唔係有咗BB?! 吓, 唔會掛?? 我完全無諗過呢個可能性喎
因為老公嘅提醒, 我鼓起最大嘅勇氣去屈記度買咗盒驗孕棒, 然後急急腳返屋企.......

Oh my god 點解會咁突然架