今日同老公參加婚禮, 埸面好感人, 感覺好溫馨, 衷心祝福 Genevieve 同 Ricky 永永遠遠都咁甜蜜恩愛

講到 Genevieve 同 Ricky 嘅婚禮, 不得不提一對精靈可愛嘅花仔花女, 實在係太太太得人鍾意












當我第一眼見到佢地嘅時候就不期然咁想像起小 Bee Bee 著起花仔 or 花女衫嘅得意樣, 真係令我好肉緊, 好想好想大啖大啖咁鍚佢一百萬啖, 好期待哦!!!

~~~~~~ 想像通常係將現實美化千萬倍嘅, 請見諒

今年生日可能係我人生中最特別同具意義嘅一年, 因為既係我成為咗黃師奶後嘅第一個生日, 亦係我成為咗"媽媽"嘅第一個生日

今日同妖女美姬見面... Oops, 而家應該改口叫 auntie 美姬先啱

3個月嘅"小氣"期解封後, 終於可以明正言順咁挺着大肚子同朋友去街。真係好!! 超級苦悶難捱嘅頭3個月終於成為歷史。(註:"小氣"期係指有左小 bee bee 3個月之內唔可以對人講架, 如果唔係佢會小氣架。)

諗返起過去3個月... 有口難言, 明明有咗 baby 但又唔可以承認。 因為唔想向朋友講大話, 所以選擇咗收埋自己玩自閉。 所有朋友聚會都唔參與但又比唔到原因, 最後甚至乎連 msn 都唔敢覆, 驚要諗藉口推朋友...............





好在一切已經雨過天晴, 而家不單可以同班豬朋狗友... Sorry Sorry 應該係知己良朋 .... 見面, 仲會享受到太后式嘅照顧。

就以 auntie 美姬為例, 上至去邊, 食乜... 都由我話"晒"事, 下至行步路都擔心我會攰......

0h 美姬, 你對我真係又細心又溫柔, I Love U ~~

豬朋狗友們, I Love U All ~~~

小 Bee Bee, Thank You Very Much ~~~

今日約咗余醫生同小Bee Bee做結構性檢查, 睇下有無任何外觀上嘅結構性缺陷, 不健全。

當我到醫務所前, 我喺心裡面不斷咁祈求上天千萬要保佑小Bee Bee一切健康正常...

喺呢個時候, 我腦裡面突然諗起爹d媽咪。 我突然感受到作為父母嘅偉大, 我好肯定爹d媽咪一樣好似我依家咁, 控制唔到自己, 所有涉及自己仔女嘅事都會不由自主咁擔心, 操心。

記得之前我自己一個喺加拿大生活, 每當我覺得身體唔舒服, 我就會打長途電話比爹d媽咪, 一心諗住撒嬌

而每次爹d媽咪聽到我(扮)悽涼嘅聲音都會好緊張, 有一次甚至叫我立即買機票返香港, 返到佢地身邊, 即使我仲未完成大學課程... 當時我並唔瞭解佢地嘅心情, 只覺得好笑, 笑佢地點可以咁亂來, 竟然為咗區區小事而教我做d咁任性嘅行為。 直致今日, 我終於真正咁瞭解佢地對我偉大無私嘅愛。 仔女對父母嚟講, 原來真係比金錢, 名譽, 一切一切都更為重要

經過余醫生嘅詳細檢查, 小Bee Bee一切正常, 手指腳指齊全, 無兔唇... 聽到醫生咁講, 我好似覺得一身輕鬆晒, 今晚可以訓番場好覺, 發番個好夢lu

原本到11月尾先做第2次產前檢查, 但從新聞報導中突然聽到一個壞消息 ~ 產自山東的多寶魚, 被驗出含有可致癌及誕下畸胎的殘餘農藥!!

呢個突如其來嘅消息將我嚇致魂飛魄散, 一諗起之前食晚飯嘅時候一心諗住食魚對小Bee Bee有益... 但結果...

我嘅眼淚不受控制咁流出嚟, 我真係好擔心好內疚。 雖然明知已經係夜晚將7點鐘, 但我決定要揾醫生幫小Bee Bee檢查。 途中我打電話比老公, 講咗情況比佢知, 於是老公陪我去咗最近嘅旺角中心, 希望當中有婦產科醫生依然應診。 我地逐層樓咁揾, 但好可惜全部醫務所都已經closed咗...

呢一晚對我嚟講真係好難過, 我根本訓唔着覺, 個心只想快d天光, 咁我就可以第一時間去見醫生。 終於到醫務所開診嘅時間啦! 我立即打電話比王醫生make appointment, 原本姑娘話所有booking都已經full晒, 但姑娘好好人咁幫我打電話, 睇吓會唔會咁啱有人可以改時間。 好在皇天不負有心人! 姑娘成功地幫我hold到個時間, 於是99就陪我急急腳咁去揾王醫生喇。

去到醫務所, 醫生話唔係大大量食用多寳魚就唔洗擔心。佢話根據上次'孔雀石綠'經驗, 都無遇到任何準媽媽因食用o左受污染海產而誕下畸胎, 醫生話現階段只要唔好再食多寶魚, 小心d同保持心境平靜開心, BB有事嘅機會只係好低。

同埋醫生話若然真係咁唔好彩, 最快都要到小Bee Bee 20weeks先會照到 (我而家只得10weeks, 所以我個case都仲未可以confirm有無事, 但頭先見佢手仔fing下fing下, 好似打boxing咁, 我已經一相情願當佢無事lu ).